БЕОҐРАД – Як вчера пренєсол Танюґ, предсидателька Народней скупштини Мая Ґойкович за нєшка на 10 годзин заказала першу, конститутивну схадзку републичного парламенту у новим зволаню.
На дньовим шоре потвердзованє мандатох 250 народним посланїком, вибор предсидателя Народней скупштини, вибор подпредсидательох, менованє ґенералного секретара Скупштини и вибор членох до роботних целох Народней скупштини.
На початку нєшкайшей конститутивней схадзки Народней скупштини гимну Сербиї будзе шпивац Мишани хор Дому култури Руски Керестур и Катедралней церкви св. о. Миколая, под дириґенством Лидиї Пашо.
После позарядових виберанкох 24. априла, у Скупштини Сербиї буду посланїки з 12 виберанкових лїстинох, а найвецей – 131 мандат – освоєла лїстина коло Сербскей напредней странки (СНС) „Александар Вучич-Сербия победзує”.
СПС-ЄС ма 29 мандати, СРС 22, „Досц було-Саша Радулович” 16, кельо и коалиция коло ДС.
Коалиция Двери-ДСС у републичним парламенту ма 13, як и коалция ЛДП-ЛСВ-СДС. Штири мандати ма СВМ, два лїстина Муамера Зукорлича, тиж два СДА Санджаку, док по єден мандат освоєли Желєна странка и Партия за демократскей дїлованє.