КУЛА – Дзевята Централна шветочносц з нагоди националного швета Руснацох у Сербиї будзе нєшка, 16. януара у Кули, у орґанизациї Заводу за културу войводянских Руснацох.
Шветочносц почнє зоз шаховским турниром на 10 г. у просторийох кулского Руского КУД, а на 15,30 г. у шветочней сали Школи за основне музичне образованє будзе промоция моноґрафиї „Зоз живота Руснацох у Кули”.
У просторийох парохиї грекокатолїцкей церкви у Кули на 16,30 г. будзе отворена вистава иконох о. Йосафата Гардия, а на 17 г. у церкви и Благодарна Архиєрейска Служба Божа.
Орґанизовани и два вистави подобових роботох уметнїцох з Кули – вистава роботох Лидиї Барна будзе отворена на 18,30 г. у Ґалериї Културного центру, а на 19 г. у Малей сали Културного центру вистава подобових роботох Амалиї Ковач. У просторийох Културного центру будзе поставени и руски етно-стол.
Шветочна академия почнє на 20 г у Велькей сали Културного центру, а по програми, на 21,30 г., коктел за учашнїкох и госцох будзе у сали Мадярского културного центру „Непкер”.
Главни финансиєр програмох Централней шветочносци Завод за културу войводянских Руснацох, того року у сотруднїцтве з Општину Кула. Програму Централней шветочносци обдумал окремни Орґанизацийни одбор, векшином составени з членох Руского КУД „Др Гаврилї Костельник”, хторе того року означує и 20-рочнїцу снованя.