Нєшка у Новим Садзе почина перши жимски фестивал

автор зам
4.5k Опатрене

НОВИ САД – На Площи шлєбоди у Новим Садзе нєшка почнє перша манифестация „Новосадски Винтер Фест”, а тот свойофайтови жимски фестивал на 18 г. отвори городоначалнїк Милош Вучевич. На отвераню участвує Дзецински хор „Канджурка” з Кикинди и леґендарни Миня Субота, а после наймладших на бини наступя старши виводзаче.

У рамикох манифестациї кажди дзень будзе Крачунски пияц, на хторим годно коштовац войводянски специялитети, алє и єдла хтори буду пририхтовац госци з амбасадох у Сербиї, буду предавани сувенири, живи ядловци, годно ше повожиц на каруци.

Кажди вечар на 18 г. дзецински хори буду шпивац крачунски и новорочни шпиванки, а од 19 г. на бини буду наступац новосадки ґрупи и ди-джеє з популарних локалних радио-станїцох. На нєдзелю будзе и вистава роботох новосадских фотоґрафох, дзеци на окремних штандох буду правиц рижни сувенири, а цала нєдзельова манифестция гуманитарного характеру.

Понеже Нови Сад 2021. року будзе Европска престолнїца култури, у рамикох манифестациї на Площи шлєбоди буду представени и скрити уметнїцки дїла з городских музейох.

„Новосадски Винтер Фест ” будзе тирвац по 3. фебруар идуцого року, а орґанизую го компания „Колор Прес Ґрупа” и „Нинамедиа”, з потримовку Городу Нови Сад.

ПОВЯЗАНИ ТЕКСТИ