РУСКИ КЕРЕСТУР – Одбор за образованє Националного совиту (НС) Руснацох иницирує же би ше окончело присподобйованє задаткох тесту з руского язика Закончуюцого испиту за маломатурантох – заключене на вчерайше трецей порядней схадзки Одбору, з хтору предшедовала предсидателька Одбору Мелания Римар. Схадзка отримана у шедзиску НС у Руским Керестуре.
Инициятиву же би ше задатки присподобело з тестами на сербским и других язикох – по возросту, терминолоґиї, чежини и бодованю на заєднїцкей схадзки тиму за составянє задаткох и преподавательох руского язика у наших школох, на схадзки Одбору порушали праве наставнїци руского язика у наших школох у Руским Керестуре, Коцуре и Дюрдьове, а пре нєправилносци хтори утвердзени того року на нєдавно отриманим Закончуюцим испиту за маломатурантох.
На вчерайшей схадзки Одбору розробени и подробносци за орґанизованє тогорочней Лєтнєй школи руского язика у Попрадзе, у Словацкей, хтора будзе од 18. по 24. юлий, а тиж утвердзене и же тогорочни дводньови Семинар за наших просвитних роботнїкох будзе у Руским Керестуре, у першей половки октобра. Семинар обдума Одсек за русинистику Филозофского факултету у Новим Садзе.
Одбор прилапел и предкладаня за стандарди сербского язика як нємацеринского у руских школох, хтори Завод за вреднованє квалитету принєсол после фахового сходу з наставнїками и на основи їх писмених заувагох.
На схадзки Одбору за образованє НС бешедоване и о активносцох медзи двома схадзками, а дзепоєдни члени предложели же би Одбор ище вецей робел на промоциї уписованя школярох до руских оддзелєньох у наших школох.
Попри членох Одбору, на вчерайшей схадзки присуствовали и предсидатель Вивершного одбору НС Желько Ковач, секретар Совиту Таня Арва Планчак, як и Александер Мудри, а у єдней часци и директорка Школи „Петро Кузмяк” Хелена Пашо Павлович и наставнїци руского язика з наших школох.