Одбор предложи пременку Закона о информованю

автор там
909 Опатрене

НОВИ САД – Одбор за информованє Скупштини АП Войводини потримує инициятиву Координациї националних совитох же би ше цо скорей вименєло Закон о явним информованю и медийох так же локални медиї, хтори маю програму на язикох националних меншинох, буду вихабени зоз поступку приватизациї

Одбор предложи Скупштинни АП Войводини же би тото заключенє принєсла уж на своєй першей схадзки, хтора будзе концом мая, бо по Закону до 30. юния шицки локални електронски медиї муша буц приватизовани.

Одбор заключел же „Руске слово“ и „Глас люду“ треба же би достали одвитуюци дїловни просториї, кед же после приватизациї „Дневника АД Нови Сад” нє годни остац у просторийох у хторих тераз робя тоти два новинско-видавательни установи на руским и словацким язику.

У будинку Дневника „Руске слово“ и „Глас люду“ находза ше од 1. януара 1967. року. Зоз покраїнского буджету за 1966. рок финансована вибудов двох поверхох праве за нїх, алє вони нїґда нє достали власносц над простором у хторим робя скоро пейдзешат роки.

АП Войводина ма 48,65 одсто власносци над капиталом „Дневника АД Нови Сад” и то основ же би Влада Войводини обезпечела змесценє за „Руске слово“ и „Глас люду“, заключене на схадзки.

Схадзка Одбору за информованє Скупштини АП Войводини, хтору водзел предсидатель Одбору Душан Яковлєв, отримана 18. мая, после инициятиви НВУ „Руске слово“ и „Глас люду“ же би ше тирвацо ришело змесценє тих двох установох у будинку „Дневника АД Нови Сад”.

На схадзки заключеня Координациї националних совитох винєсла Ана Томанова Маканова, подпредсидателька Скупштини АП Войводини, членїца Одбора за информованє Скупштини АП Войводини и предсидателька Националного совиту словацкей националоней меншини, Славко Рац, предсидатель Националного совиту рускей националней меншини, члени Одбору, Смиля Максимович, помоцнїк Покраїнского секретара за културу и явне информованє, и директоре „Гласа люду“ и „Руского слова“ Самуел Жяк и Мартица Тамаш.

ПОВЯЗАНИ ТЕКСТИ