У Вербаше у каждей хвильки у змесценю за псох блукачох Явней аґенциї за зоогиґиєну и польопривреду (ЯЗИП) єст 150 пси, а на улїцох 100 – кед ше отвори даєдно шлєбодне место екипи виходза на терен и позбераю нови. У Аґенциї апелую на одвичательне справованє власнїкох псох.
На вербаских улїцох остатнї час векше число псох блукачох, а з Явней аґенциї за зоогиґиєну и польопривреду (ЯЗИП) спозорюю же капацитети за змесценє дочасового змесценя за пси пополнєти до остатнього места, и док ше „пристановени” пси нє удоми до обисцох заинтересованих гражданох – псох блукачох нє годно склонїц з городских улїчкох.
– У каждей хвильки зме полни, зоз 150 пси у лєтнїм периодзе и 120 у жимским. Нови пси можеме прилапиц лєм кед ше даєдного пса удоми и так функционуєме уж длугши час. Такой кед єст шлєбодне место нашо екипи виходза на терен и позбераю нови пси, алє єден або два пси хторих ше склонї у одношеню на число хторе ше у тей хвильки находзи на улїчкох – вообще нє досц. Наша прецена же у тей хвильки на улїчкох єст вецей як 100 псох блукачох – визначел о.д. директора ЯЗИП-у Марко Дюркович и додал же преширенє капацитетох дочасового змесценя нє риши проблем, бо вон, у найвекшей мири настал пре нєодвичательне одношенє власнїкох псох ґу своїм любимцом. А єст и други причини.
– Нє шме ше дошлєбодзиц псови же би вишол зоз двора и врацел ше о даскельо днї, окреме кед є нє стерилизовани. Планска стерилизация вихабена, а мира чипованя нє витворена до конца. Лєм дзепоєден пес хторого лапиме чиповани, а векшина нє чипована. То значи же ше або вельо накоцели, або їх дахто „уруцує” з боку. Нашо спознаня гуторя же и того можебуц єст, бо лапаме и пси хтори чиповани у Темерину, Апатину, Србобрану и других општинох – гварел Дюркович.
Вон спозорел же власнїки псох муша мерковац дзе ше рушаю, нє шму их пущац же би ше шлєбодно шейтали звонка двора, бо то шицко спричинює нєконтроловани рост популациї.
– Преширенє капацитетох нє ришенє. З нєодвичательним справованьом вше будземе мац пси на улїчкох, и гоч их кельо „пристановиме” – будземе на вдереню явносци бо вше сцигую нови. У тих чежких часох чежко обезпечиц додатни средства за поживу, лїки и други потребни средства за пси – додал Дюркович.
Заш лєм, єдна велька акция пристановйованя псох штварток орґанизована у Новим Садзе, а вона голєм на кратко ошлєбодзи капацитет вербаского дочасного змесценя.
– Нєшка коло двацец пси придаме новим власнїком, младим паром хтори у акциї Влади Войводини достали средства за купованє хижи на валалє. Їх нови двори од нєшка буду чувац пси з нашого дочасового змесценя – визначел Дюркович и апеловал и на других гражданох же би нащивели ЯЗИП и вибрали пса за свойо ґаздовство и так зоз гуманим ґестом помогли заєднїци же би ше виборела з проблемом псох блукачох.
ДРУГИ АКЦИЇ ЯВНЕЙ АҐЕНЦИЇ
У планох вербаскей Аґенциї и вибудов трансфер станїци за анимални одпад хтора би таки одпад требала зазберовац нє лєм з вербаскей, алє и сушедних општинох.
А понеже вербаски ЯЗИП ма вецей сектори, у тим периодзе у Секторе за польопривреду и лєсарство актуалне полєшованє, алє и предаванє саднїцох, младих овоцох – кайси, шлївки, вишнї, черешнї и грушки, як и лєсових древох, та у розсадїнку маю саднїци платану, явор, брезу, гестинї, целтис, тополю – хтори шицки гражданє можу купиц.