КУЛА – Одборнїки Скупштини општини (СО) Кула вчера прилапели Одлуку о задлужованю Општини Кула на 300 милиони динари, наменски за вибудов поцискуюцого воду на канализацийней мрежи Червинка-Кула, зоз законченьом вибудови канализацийних мрежох у Червинкии и Кули.
Толкуюци Одлуку, заменїк предсидателя Општини Велибор Милоїчич гварел же ше задлужованє пребера у напряме ришованя заґадзеносци червинского и кулского беґелю, цо єден з найвекших еколоґийних проблемох у кулскей општини, а одрутни води буду исц до построєна за пречисцованє у Вербаше, хторе початком идуцого мешаца почнє з пробну роботу.
Општина Кула ше за тоту капиталну инвестицию задлужи на 9 роки, з дворочним ґрейс-периодом, а у тим будзе вихаснована и можлївосц доставаню ґранту з єдней нємецкей банки хтора потримує проєкти з обласци защити животного штредку, так же будзе врацац 240 милиони динари. Як гварел Милоїчич, у тим року за тоту вельку инвестицию Општина ма обезпечени пенєж зоз свойого Фонду за защиту животного штредку.
На вчерайшей схадзки СО Кула прилапени звити о роботи трох явно-комуналних подприємствох (ЯКП) – у Кули, Сивцу и Руским Керестуре, та Дому здравя Кула, дата согласносц на розподзельованє доботку тих ЯКП, як и согласносц на дополнєня їх програмох дїлованя у тим року.
Одборнїки прилапели инициятиву Одборнїцкей ґрупи Сербскей напредней странки (СНС) о порушованю поступку же би дакеди популарни Рекреацийни центер у Кули, хтори ма базен, ресторан и хижи за спанє, прешол до явней власносци. Рекреацийни центер тераз часц предликвидацийней маси „Розвойней банки” у предликвидациї, а дакеди бул власносц кулскей Штофари.
З вчерайшу Одлуку на схадзки локалного парламенту же би ше ликвидацийни остаток од 55 000 динари Явного подприємства „Туристична орґанизация Општини Кула” пренєсло на снователя, Општину Кула, будзе оможлївене цалосне гашенє и сцеранє того подприємства з Реґистру привредних субєктох.
Пре виходзенє мандату, СО Кула вчера перше розришела, а потим и меновала нових членох школских одборох у 10 основних и штреднїх школох у местох општини, медзи нїма и Основней и штреднєй школи з домом школярох „Петро Кузмяк” у Руским Керестуре. Вчера розришени и дотерашнї, а меновани нови Управни и Надпатраюц одбор Дому култури Руски Керестур.
За директора Културного центру Кула СО меновала Каменка Бертича, дотерашнього окончователя длужносци директора тей установи, заменїк началнїка Општинскей управи Стєпан Вакула вибрани за члена Комисиї за кадрово и административни питаня и роботни одношеня СО, а основана и Комисия за плани Општини Кула, хторей на чолє будзе дипл. инж. архитектури Славко Срдич.
На початку вчерайшого зашеданя предсидателька СО Кула Снежана Мркаич сообщела же штверо дотерашнї одборнїки Демократскей странки Сербиї (ДСС) прешли до Одборнїцкей ґрупи СНС, а єден одборнїк будзе дїловац як самостойни.
Шеф Одборнїцкей ґрупи СНС Перица Видеканїч, як и дзепоєдни други одборнїки, вчера критиковали нєприсуство одборнїкох з опозициї на остатнїх схадзко СО Кула, а навчерайшей були троме.