СЕРБИЯ – Вчера ширцом Сербиї означени 17 роки од початку НАТО-бомбардованя тедишнєй Союзней Републики Югославиї, хторе тирвало 78 днї, а под час хторого погинуло вельке число людзох, знїщени числени обєкти, як цо то школи, медийни установи, здравствени установи, памятнїки.
Як пренєсли нашо медиї, централна державна комеморативна церемония отримана у Варварину, при Памятнїку на погинутих гражданох на Варваринским мосце. На церемониї, хтору предводзел премиєр Сербиї Александар Вучич, присуствовали и предсидатель Републики Сербскей Милорад Додик, гражданє котри прежили, фамелиї жертвох, представителє Войска Сербиї, представителє Сербскей православней церкви, дипломати и оцец 15-рочней Санї Миленкович, котра була наймладша жертва у Варварину.
– Бомби забивали хлопох, жени и дзеци, знїщовали шпиталї и фабрики. Ноц 24. марца навики останє зазначена у сербскей историї як єдна з найгорших – гварел Вучич и додал же то була „безсмислова аґресия на малу жем, поход хтори нїч нє ришел”.
Перши дзень, односно вечар бомбардованя, 24. марца бомбардовани и полицийно-воєни обєкт Штолц коло Кули.