НОВИ САД – Вчера у Шветочней сали Городскей хижи урядово означени Дзень Городу Нови Сад, як здогадованє на 1. фебруар 1748. року, кед Нови Сад здобул статус „Шлєбодного кральовского городу“ у рамикох Габзбурґскей монархиї, а статус шлєбодного кральовского городу одкупели гражданє Нового Саду.
Городоначалнїк Нового Саду Милош Вучевич и предсидатель Скупштини Городу Синиша Севич привитали делеґациї з 23-ох городох, як и представительох Влади Републики Сербиї, Автономней покраїни Войводини, Влади Косова, городскей управи, вирских заєднїцох и гражданох Нового Саду.
– Пред 267 роками, дзекуюци визионерству наших предкох, Нови Сад здобул тото з чим ше вше цешиме – статус, мено, шлєбоду и можлївосц же би ше розвивал як модерни, напредни, отворени и ушорени город. Нови Сад би нє бул тото цо є кед би нє бул богата вецейнационална заєднїца у хторей ше обичаї и традициї преплєтаю и допатраю. Тоти вредносци мушиме допатрац и чувац – гварел Вучевич на шветочносци.
После урядового означованя у Городскей хижи, у Сербским народним театру отримана Шветочна академия.