БЕОҐРАД – Амбасадор України у Републики Сербиї Олександр Александрович вовторок 1. септембра, орґанизовал приєм з нагоди Дня нєзависносци України.
У привитней бешеди Олександрович здогаднул госцох на длугу историю українского народу, як и на подїї зоз новшей прешлосци, як цо Помаранчецова револуция, хтора закончена на мирни способ и Евромайдан, дзе було на стотки жертви.
– Реалну нєзависносц нє достали зме 1991. року, алє 2014. року кед цали народ одразу похопел же то наша жем и же ше вредзи бориц за ню. Українци и Серби ше закладаю за фундаментални европски вредносци як жеми членїци Совита Европи и ОЕБС. Медзитим, кед слово о правох и шлєбодох, ту нєт места за нєутралносц – гварел амбасадор Александрович.
Попри представнїкох политичного, културного и явного живота у Републики Сербиї, на приєму бул спред грекокатолїцкей церкви Апостолски еґзарх за грекокатолїкох у Републики Сербиї кир Дюра Джуджар и протоєрей ставрофор, директор Каритасу Сербиї и декан беоґрадски о. Владислав Варґа, спред Руснацох предсидатель Националного совиту рускей националней меншини Славко Рац, и представнїки институцийох значних за Руснацох: шеф Одсека за русинистику Филозофского факултета у Новим Садзе академик Юлиян Тамаш, директорка НВУ „Руске слово” Мартица Тамаш и директор Завода за културу войводянских Руснацох Серґей Тамаш. На приєму бул и предсидатель Союзу Руснацох Українцох Сербиї Боґдан Виславски.
