ШИД – З пригодну шветочносцу у сали Културно-образовного центра, присподобену епидемиолоґийним миром защити од вируса корона, вчера означени 6. децембер, Дзень општини, и 76-рочнїца ошлєбодзеня од фашизму.
Предсидатель Скупштини општини Тихомир Стаменкович здогаднул на ошлєбодзенє Шиду пред 76 роками и поручел же героє хтори дали животи за шлєбоду нїґда нє буду забути.
О ошлєбодзеню кратко здогаднул и Зоран Семенович, предсидатель Општини, хтори и придал награди хтори ше традицийно додзелюю з нагоди Дня општини.
Найвисше општинске припознанє – Децемберску награду, достало Здруженє женох Филип Вишнїч з Вишнїчева, прияла ю предсидателька Ґордана Шкорич, а Плакети достали Ґенералштаб Войска Сербиї и ґенерал майор Петар Цветкович, заменїк началнїка Ґенералштаба.
Дополадня представнїки локалней самоуправи и борецкей орґанизациї покладли венци на памятнїк погинутим борцом на городским теметове и на спомин плочу на Културно-образовним центру.
