ВУКОВАР – У орґанизациї Координациї рускей националней меншини Републики Горватскей, у Городским музею Вуковар всоботу, 21. мая, седми раз отримана централна Шветочна академия з нагоди Дня Руснацох у Републики Горватскей (РГ).
По кладзеню венцу на Криж на улїву Вуки до Дунаю, у Городским музею отримана промоция кнїжки „Народне облєчиво бачаванско-сримских Руснацох и танци бачаванско-сримских Руснацох”, у виданю Заводу за културу войводянских Руснацох з Нового Саду.
На промоциї бешедовали директор Заводу мр Серґей Тамаш, хореоґраф и директор Дому култури Руски Керестур Йоаким Рац Мими, та заменїк предсидателя Националного совиту (НС) Руснацох у Сербиї Йовґен Мудри. Модератор промоциї була Агнетка Балатинац, а каждому рускому КУД и парохом з Миклошевцох и Петровцох, котри були на промоциї, подаровани по прикладнїк представяней кнїжки.
Шветочна Академия почала з интонованьом гимни Републики Горватскей и Шветочней шпиванки Руснацох у РГ „Браца Русини”, котри одшпивали Женска шпивацка ґрупа КУД „Яким Ґовля” з Миклошевцох и Хлопска шпивацка ґрупа КУД „Яким Гарди” з Петровцох, а на гармоники их провадзел Звонко Еделински.
Визначни госци, медзи котрима бул дожупан Вуковарско-сримскей жупаниї Дьордє Чурчич и городоначалнїк Вуковару Иван Пенава, та владически викар Славонско-сримского викарияту Крижевского владичества о. Яким Симунович, з пригоднима словами Руснацом у РГ повинчовали їх дзень, док шицких присутних привитали водителє конферанси Мануела Дудаш и Иван Лїкар.
На означованю Дня Руснацох у РГ була и делеґация з Войводини, на чолє зоз заменїком предсидателя НС Йовґеном Мудрийом и предсидательом Вивершного одбору НС Жельком Ковачом. Присуствовали и шицки предсидателє радох рускей националней меншини як и представителє Руснацох у городох и жупанийох у Горватскей, та предсидателє руских КУД-ох, представителє церкви и предсидателька Союзу Руснацох РГ Дубравка Рашлянин.
З вибранима шпиванками о Руснацох на Шветочней академиї участвовали КУД Руснацох Осиєк, Дружтво „Руснак” з Петровцох, КУД „Осиф Костелник” з Вуковару, КД Руснацох з Винковцох, Хлопска шпивацка ґрупа КУД „Яким Гарди” з Петровцох и Женска шпивацка ґрупа КУД „Яким Говля” з Миклошевцох.
Вибор з поезиї руских писательох з Горватскей рецитовали Леся Мудри, Анабела Кнежевич, Сабина Ждиняк, Мая Гарди, Марина Колбас и Матей Бурчак, док Томислав Рац и Владимир Дудаш рецитовали писню Миколи М. Кочиша „Ми”. Рецитаторох пририхтали учительки руского язика Илона Грецешин, Наталия Гнатко и Леся Мудри, як и рецитатор Томислав Рац, док конферансу за Академию написала Агнета Бучко Папгаргаї.
Шветочносц отримана под покровительством жупана Вуковарско– сримскей жупаниї Божу Ґалича, а по законченю програми у просторе Ггородского музею отримани пригодни банкет, на хторим присуствовали шицки учашнїки, госци и публика.