РУСКИ КЕРЕСТУР – Вчера, 15. марца, у Руским Керестуре отримана Шветочна Скупштина Карате-клубу „Русин” з нагоди двох значних ювилейох – 40-рочнїци каратеа у Руским Керестуре и 35-рочнїци снованя Карате-клубу (КК) „Русин”.
Госцох, медзи котрима були и предсидатель Шотокан Карате-союзу Сербиї Милорад Чопич, предсидатель судийскей комисиї Шотокан союзу Сербиї Миша Милосавлєвич, предсидатель Шотокан Карате-союзу Войводини Ранко Ступар, та числених дакедишнїх и терашнїх членох Клубу и спонзорох, на Скупштини привитал Тренер у КК „Русин” Михал Орос, котри бул и главни орґанизатор тей Шветочней Скупштини.
Пречитани реферат о историяту КК „Русин” и представена Моноґрафия „40 роки каратеа у Руским Керестуре”, хтору пририхтал спомнути Орос. Автор моноґрафиї з тей нагоди пририхтал и таблон на хторим представени перши члени Клубу, алє и виставу фотоґрафийох з роботи и змаганьох членох Клубу од початкох по нєшка, як и медальох и припознаньох хтори керестурски каратисти освоєли.
На концу Шветочней Скупштина КК „Русин” клубом, поєдинцом, дакедишнїм и терашнїм членом уручел подзекованя и припознаня.
