НОВИ САД – Округли стол з тему „Социялна инклузия, интеркултуралносц и Асоцияция наставнїкох на меншинских язикох”, як закончуюца активносц проєкту з назву „Здруженя наставнїкох на меншинских язикох, инклузивне и интеркултуралне образованє”, отримани 30. юния у Заводзе за културу войводянских Руснацох у Новим Садзе. Найвецей бешедоване о проблемох меншинского образованя, алє и о тим яке образованє нам потребне у 21. вику, а проєкт орґанизовал Граждански фонд Панония, з потримовку Фонду за отворене дружтво з Беоґраду.
Сущносц проєкту же би ше на орґанизовани способи вислухало наставнїкох, їх проблеми, же би ше им дало механїзми з хторима би могли уплївовац на тих котри приноша закони у образованю, або правя реформи, односно же би ше през здруженя чуло глас учительох, наставнїкох, професорох, а нє давало им уж „готови ришеня” за применьованє у наставним процесу.
За истим столом були фаховци з обласци образованя, представителє нєвладових орґанизацийох, здруженьох, покраїнских институцийох, представителє националних совитох, школох и професоре, а бешедовали им Татяна Стоїч, спред Фондациї за отворене дружтво, др Лїляна Левков, спред проєкту „Развионица”, Милица Ґраховац з Центру за образовни политики, Биляна Стоянович, совитнїк и сотруднїк у Панонийовим проєкту и координаторка проєкту Даница Стефанович.
Єлена Криш-Пиґер з Покраїнского секретарияту за образованє, предписаня управу и национални меншини-заєднїци, на сходзе виявела же Секретарият и убудуце будзе потримовац проєкти хторим приоритет квалитетнєйше образованє.
Спред Руснацох на округлим столє була предсидателька Одбору за образованє Националного совиту Мелания Римар, як и представителє дюрдьовскей ОШ „Йован Йованович Змай”, хтора була уключена до проєкту, на чолє з директорку Марию Тртич.
Як часц потримовки спомнутому проєкту и подобним семинаром Гражданского фонду Панония, Завод за културу Войводянских Руснацох подписал тройнїсти Меморандум о сотруднїцтве з ТИМ-ом (Центер за виглєдованє и едукацию) и Гражданским фондом Панония, пре заєднїцке конкурованє до рижних европских проєктох и фондох.