НОВИ САД – У просторийох Нєзависного дружтва новинарох Войводини вчера, 14. юния, отримани Округли стол о медийних шлєбодох, софинансованю медийох и улоги нєзависносци явних сервисох у реґионє.
О спомнутим бешедовали Вукашин Обрадович, Саня Кляїч, проф. Дубравка Валич Неделькович и Недим Сейдинович, з наглашеньом на принєшени сет нових медийних законох, улогу и уровень нєзависносци явних сервисох, проблеми медийох националних меншинох и на спокуси з хторима ше стретаю новинаре у реґионє.
Як поведзене, законски предписаня у медийох, хтори принєшени у авґусту 2014. року, достали позитивни оцени и на ширшим просторе. Медзитим, нєодлуга дожили прави фияско, насампредз прето же власц нє похопює медиї як штварти слуп демократиї и корективни елемент власци.
Два елементи у законох маю пресудни значносц – приватизация и конкурсне финансованє, а обидва нє випочитовани. Обачлїве же ше держава, реално, ище вше нє посцагла з власнїцтва над медиями, а ґу тому, принципи финансованя ше злохаснує, гварене на вчерайшим округлим столє.