НОВИ САД – У просторийох Медия центру Войводини у Новим Садзе пияток, 6. мая отримана розгварка о меншинским и вецейязичним информованю у контексту запровадзованя медийних законох.
У рамикох дебати презентована публикация „Звит о меншинским и вецейязичним информованю”, хтору виробело Нєзависне дружтво новинарох Войводини. Авторе публикациї указали на рижни проблеми хтори настали як провадзаце зявенє нових медийних законох, як цо то потупйованє Закона у сфери конкурсного софинансованя, а єдна з главних темох була и процес приватизациї медийох.
– Кед опатриме податки виглєдованя, мож повесц же тот процес, нажаль, ище вше нє закончени. Спомедзи 73-ох медийох облапених з процесом за 10 нєизвесна судьба, а медзи нїма и 7 вецейязични медиї – гварела Жужана Серенчеш, коавторка публикациї.
Заключенє спомнутого виглєдованя и же у тей обласци тераз праве конфузия и нєзакончени процес полни з контрадикторносцами у запровадзованю медийних законох, а представителька Мисиї ОЕБС-у Саня Станкович визначела же меншинске информованє значне, бо доприноши розвою духа заєднїцтва, толеранциї и мултикултуралносци у вецейнационалних штредкох.