ВЕРБАС – Вчера у будинку Општини Вербас отримана схадзка вязана за приватизацию Явного подприємства за информованє Вербас, односно о програмох на язикох националних меншинох, хтори би и после процесу приватизациї мали остац у Информативним центре.
На схадзки предложене же би була основана ґрупа хтору буду твориц представителє Националного совиту (НС) Руснацох и НС Мадярох, началнїца Оддзелєня за дружтвени дїялносци Мира Недич и директорка Информативного центру Весна Роґанович. Тото цело би мало заступац интереси информованя на язикох меншинох пред висшима орґанами и провадзиц стан на терену.
З тей нагоди локална самоуправа националним совитом дала ґаранцию же будуцого власнїка подприємства за информованє обовяже же би у Вербаше затримал програму на язикох националних заєднїцох така яка є тераз.
Предсидатель Вивершного одбору НС Руснацох Желько Ковач на схадзки визначел же инициятива за очуванє програмох на язикох меншинох у локалних медийох и по їх приватизованю дата на Одборе за информованє НС Руснацох, та тот сход у Општини Вербас отримани у напряме превентивного дїлованя, же би ше ту и надалєй витворйовало законске право националних меншинох, односно програми на руским, мадярским и українским язику як и дотераз.
На схадзки присуствовал и членїца Одбору за информованє нашого НС Еуфемия Ґшвенґ з Вербасу, як и предсидатель КПД „Карпати” др Деян Загорянски.