ЖАБЕЛЬ – Предсидатель Општини Жабель Чедомир Божич пияток, 23. септембра мал схадзку з директором Розвойного фонду АП Войводини (РФВ) Ґораном Савичом, на хторей бешедоване о сотруднїцтве и орґанизованю презентациї за потенциялних хасновательох кредитох у жабельскей општини хтори понука тот фонд.
Хаснованє средствох Фонду засноване на кредитним моделу, през конкурсну процедуру, а тераз отворени 11 конкурси за длугорочне и краткорочне финансованє индивидуалних польопривредних ґаздовствох, правних особох и поднїмательох.
Директор РФВ представел финансийну потримовку розвойним програмом у секторе продукциї и преробку, польопривредней продукциї и услужней дїялносци. Савич визначел и же Фонд потримує дїлованє польопривреднїкох, поднїмательох, малих и штреднїх подприємствох, програми орєнтовани ґу вивозу, та програми хтори софинансує Европска уния.