ВЕРБАС – Протест Самостойних синдикатох Општини Вербас занятих у явним секторе, хтори мал буц отримани вчера пре нєпорядне виплацованє плацох – одказани, понеже представителє синдикатох посцигли догварку з чолнїками Општини.
На схадзки з представителями синдикатох, хтора отримана 24. фебруара, предсидатель Општини Вербас др Братислав Кажич прилапел проблеми занятих у явним секторе, алє указал и на чежки финансийни стан у хторим ше Општина тераз находзи.
На концу схадзки подписане Споразуменє медзи Општину Вербас и Раду Союзу самостойних синдикатох о динамики виплацованя плацох, у складзе з можлївосцами, по хторим заняти у явним секторе у єдним мешацу буду доставац два часци мешачней плаци.