СТАРИ ЯНКОВЦИ (ГОРВАТСКА) – У орґанизациї Координациї рускей националней меншини Републики Горватскей, а под покровительством Вуковарско-сримскей жупаниї, всоботу, 30. мая, на стадионє Ґатина у Старих Янковцох отримана 8. Рутенияда – змаганє школярох з местох дзе жию Руснаци у старих руских спортских бависко. Змагали ше 12 екипи з трох школох – з Петровцох, Миклошевцох и зоз Старих Янковцох.
Пре хороту даскелїх школярох, виостала екипа з Пишкуревцох, а орґанизатором нє познати причини нєприходу екипох з Войводини.
Од першей по штварту класу ОШ участвовали шейсц екипи – три зоз Старих Янковцох, два з Петровцох и єдна з Миклошевцох, як и у конкуренциї школярох од пиятей по осму класу – штири зоз Старих Янковцох и два з Миклошевцох. Школяре ше змагали чинаґаню, пиличканю, руцаню подковох, джочканю (пасульканю- лєм нїзши класи), поцагованю штранґу и беганю у меху (штафетни способ).
При школярох од 1. по 4. класу за перше место розбавйовали екипа Петровцами 2 и Миклошевци, Петровчанє були лєпши и освоєли 1. место, погар и златну медалю. Друге место и стриберну медалю освоєла екипа з Миклошевцох, а треце место и бронзову медалю екипа Стари Янковци 2.
У катеґория школярох од 5. по 8. класу 1. место, погар и златну медалю освоєла екипа Стари Янковци 1, друге место и стриберну медалю екипа Миклошевци 2 (дзивчата), а треца була екипа Миклошевци 3 (хлапци), хтора освоєла бронзову медалю.
Бависка того року отримани и у рамикох Дньох Општини Стари Янковци.