ВЕРБАС – Пияток, 29. януара, у Вербаше отворени репрезентативни просториї Националного совиту (НС) Чарногорцох, а крем пригодней програми, з тей нагоди орґанизована и вистава познатого европского маляра з Цетиня Димитрия Поповича.
Як визначел предсидатель НС Чарногорцох Ратко Шоч, просториї достати лєм после рока постояня Совиту, а предсидатель Општини Вербас др Братислав Кажич гварел же тоти красни просториї буду место за промовованє звїчайох и култури того народу. Предсидателька Скупштини општини Вербас Маряна Мараш на отвераню просторийох здогадла же у вербаскей општини жию 7 353 гражданє чарногорскей националней заєднїци.
Нащивительох привитали и подпредсидатель Скупштини АП Войводини Миливоє Вребалов, конзул Чарней Гори у Сербиї Миодраґ Канкараш и директор Управи за дияспору Чарней Гори Предраґ Митрович, а на шветочносци присуствовали и предсидатель и подпредсидатель НС Руснацох Славко Рац и Микола Шанта.