ВЕРБАС – На дражкох Центру за физичну културу „Драґо Йовович” у Вербаше вовторок отримана перша мини-олимпияда за дзеци з Предшколскей установи (ПУ) „Бошко Буха” – ”Атлетска яр”.
Олимпияду орґанизовала Мала школа спорту „Jumper”, з цильом промованя спорту и од предшколского возросту. Вовторок у програми участвовали коло 200 хлапци и дзивчата од 4 до 6 роки з обєкту „Бубица” ПУ у Вербаше, а план же би ше уключели и други обєкти тей ПУ.
Професорови физичного воспитаня Данилови Нярадийови, котри бул орґанизатор змаганя, помагали и други тренере з Малей школи спорту, як и школяре вербаскей Ґимназиї котри ше пририхтую за упис на факултет физичней култури.
Манифестация мала вельо спонзорох, а проєкт потримали и Општина Вербас и Покраїнски секретерият за спорт и младеж.