РУСКИ КЕРЕСТУР – Перше место у младшим возросту на вчерайшей Месней смотри рецитаторох Руского Керестура освоєла Минеа Югас, друге Микола Еделински, а треце место освоєла Валентина Новта.
У катеґориї штреднього возросту перше место освоєла Тимеа Будински, друге Желько Виславски, треце Матей Шепински, док у конкуренциї старшого возросту победзел Мирослав Малацко, друге место освоєла Мария Малацко, а треце Соня Кнежевич, котра рецитовала по сербски. Вєдно, на Смотри участвовали 22-ойо рецитаторе у трох возростох.
Месна смотра рецитаторох отримана у просторийох Дому култури, хтори бул и єй орґанизатор у сотруднїцтве з Културно-просвитну заєднїцу Општини Кула, а зоз змаганьом у Керестуре почал тогорочни циклус месних смотрох рецитаторох у кулскей општини, хтори буду закончени 6. марца.
Селекторка шицких месних смотрох у општини Слободанка Настасич з Кули, а консултант за руски язик Михайло Зазуляк з Керестура.
Як госци на Смотри наступели Иван Планчак и Яна Варґа з дзецинскей заградки, та вецей школяре керестурского Оддзелєня кулскей Школи за основне музичне образованє.
Рецитаторох за Месну смотру пририхтали учительки у Школи „Петро Кузмяк” Нада Колошняї, Веруна Медєши, Ксения Бодянец, Любица Бучко, Ясмина Сабадош и Мелания Рамач, як и руководителька Рецитаторскей секциї у Доме култури Ивана Дудаш.
Нєшка будзе Месна смотра у Кули, а Општинска смотра рецитаторох у Крущичу будзе 14. марца.