КУЛА – Вчера у Кули отримана порядна Рочна скупштина Руского КУД „Др Гавриїл Костельник” на хторей прилапени звит о роботи и финансийни звит за прешли, як и план роботи за тот рок, з наглашеньом же робота и програми буду у знаку тогорочней 20-рочнїци снованя Дружтва.
Означованє ювилею уж почало з удатним пририхтованьом и отримованьом програмох тогорочней Централней шветочносци з нагоди Националного швета Руснацох 16. януара у Кули, а як предложене на Скупштини, можлїве же 20-рочнїца Руского КУД того року будзе орґанизована и з окремну академию на уровню городу Кули.
Звит о роботи винєсол предсидатель РКУД Владимир Бучко у хторим, медзи иншим, наглашене же Женска шпивацка ґрупа, под руководительством Еуфемиї Планкош, прешлого року участвовала на Покраїнским фестивалє у Вербаше, же шпивацки ґрупи участвовали на наших фестивалох, рецитаторе на змаганьох и „Костельниковей єшенї”, дзе РКУД и порядни орґанизатор Стретнуца рецитаторох. Прешлого року, з анґажованьом младей режисерки з Вербасу Александри Лендєр и помоцу Амалиї Ковач з Кули, знова робела и Дзецинска драмска секция, хтора госцовала и у Словацкей, у Михаловцох.
Младши и старши члени кулского Дружтва участвовали и на других програмох Руснацох у Войводини, а план роботи подобни як и прешлорочни, з новосцу же, попри пририхтованя дзецинскей представи, Владимир Лазор уж запровадзел роботу Шаховскей секциї за дзеци, а пробує ше анґажовац и єдного фаховца з Кули за роботу з младима тамбурашами.
Як и скорей, кулске РКУД и прешли финансийни рок закончело позитивно, понеже до 2016. вошло зоз скоро 332 000 динари на рахунку, винєсол на Скупштини Янко Такач. Цалосни прешлорочни приходи Дружтва були 696 158 динари, найвецей од Општини Кула – 210 000, од Националного совиту Руснацох за роботу Подручней канцелариї 153 000, од Заводу за културу войводянских Руснацох (ЗКВР) 16 950, а з 2014. року були пренєшени 316 208 динари.
Як поведзене на тей рочней схадзки, у пририхтованю за Централну шветочносц националного швета прешлого року витворене наисце барз добре сотруднїцтва зоз ЗКВР, а на другим боку виражене нєзадовольство з финансованьом фахових сотруднїкох за потреби Дружтва, понеже ту ЗКВР участвовал лєм за пририхтованє шпивацких ґрупох за Фестивал „Най ше нє забудзе” у Дюрдьове. Члени РКУД думаня же така пенєжна помоц од Заводу потребна за цали рок, як и помоц за анґажованє фахових сотруднїкох у других обласцох.