КУЛА – Скупштина Културно-просвитеней заєднїци Општини Кула вчера у Кули прилапела звити о роботи и финансийним дїлованю за прешли, 2014. рок, як и програму роботи и финансийни план КПЗ за тот рок, гоч, як поведзене – у нєзвичайним терминє, бо ше таки документи розпатра початком рока.
Медзитим, як потолковане, до того пришло пре нови способ програмно-проєктного финансованя з буджету Општини, так же средства и за КПЗ и за орґанизациї у култури були познати аж у маю-юнию того року, пре розписованє конкурсох и одлучованє о проєктох.
Општински и други смотри хтори орґанизує КПЗ Кула починаю початком рока и, як гварел секретар КПЗ Сава Прерадович, орґанизовани су ткп. „на борґ”, бо до мая КПЗ нє розполагала з пенєжом, а виражене наздаванє же конкурси за орґанизациї з обласци култури за идуци рок буду розписани вельо скорей. КПЗ Кула обєдинює роботу шицких установох у култури и КУД-ох у кулскей општини, алє и вона и орґанизациї, за средства конкурую поєдинєчно.
Прешлого року КПЗ Кула розполагала зоз 3 милиони 730 000 динари, з вєдно 8 милионох кельо у буджету було опредзелєне за културу, а як дотациї, на основи конкурованя, з покраїнских и републичних орґанох достати ище 447 275 динари. У тим року за КПЗ з буджету опредзелєни 2,5 милиони, а цалосни приход плановани на дацо вецей як 2,9 милиони динари.
И попри тим же средства за културу зменшани, кулска општина, гоч нє велька, по квантитету, а ище баржей по квалитету и резултатох на змаганьох, и надалєй медзи найлєпшима у Сербиї, цо треба отримац и надалєй – гварене на вчерайшей схадзки Скупштини КПЗ, з хтору предшедовал член Предсидательства КПЗ и директор керестурского Дому култури Йоаким Рац.