ВЕРБАС – Прешлого штварку отримана схадзка Скупштини општини Вербас на хторей констатоване преґрупованє у одборнїцких шорох, так же формовани аж два нови одборнїцки ґрупи – єдна Партиї зєдинєних пензионерох Сербиї, Союзу войводянских Мадярох и нєзависного одборнїка (у тей одборнїцкей ґрупи и Стеван Самочета з Коцура), а друга Єдинственей Сербиї и єдного нєзависного одборнїка.
Попри тим, пришло до пременки и у составе Општинскей ради, бо з длужносци розришена членїца Ради Ливиа Боґанч Андрияшевич (задлужена за польопривреду) зоз Союзу войводянских Мадярох, а нови член Ради постал Данило Мараш, з Партиї зєдинєних пензионерох Сербиї.
Одборнїки прилапели одлуки по 22. точкох дньового шору, медзи нїма и Одлуку о прилапйованю рочного ликвидацийного звиту Явного подприємства за информованє „Вербас”, Одлуку о прилапйованю початного ликвидацийного билансу ЯП „Дирекция за вибудов”, та Одлуку о анґажованю ревизора за екстерну ревизию закончуюцого рахунку општинского буджету за 2015. рок.