ШИД – Вчера у Шидзе отримане стретнуце священїкох и вирних з парохийох Сримского деканату нашого Апостолского еґзархату – зоз Сримскей Митровици, Бачинцох, Беркасова и Шиду. Стретнуце почало у церкви Преображеня Господнього з Молебеном до Пречистей Дїви Мариї, хтори служел домашнї парох о. Михайло Режак.
Парох у Сримскей Митровици о. Владислав Варґа викладал о Божим милосердию, визначуюци же би кажди вирнїк требал зробиц даяке добре дїло ґу своїм ближнїм, лєбо людзом у потреби и же би кажда парохия мала спатриц цо у своїм штредку може зробиц по питаню милосердия.
Стретнуце предлужене у Лєтнєй владическей резиденциї, дзе вивершни директор Каритасу Апостолского еґзархату за грекокалтилїкох у Сербиї Янко Катона викладал о искуствох каритативней роботи у парохиї у Руским Керестуре.
Координаторка Каритасу у Новим Садзе Анита Ґовля бешедовала о роботи з ментално гендикепованима особами, о активносцох з ромску популацию, як и о запровадзованю активносцох Каритасу прейґ рижних роботньох.
Дипл. психолоґиня Соня Виславски кратко представела активносци Центру за слуханє „Нїтка” и як и кельо його активносц помага людзом. Свойо активносци представели и домашнї Шидянє, а о гуманитарних активносцох у Сримскей Митровици бешедовал о. Владислав Варґа.
Попри спомнутих, на стретнуцу були и бачински парох о. Дарко Рац и парох у Беркасове и Бикичу о. Владимир Еделински Миколка.
Госци поопатрали и будинок Лєтнєй владическей резиденциї, а часц стретнуца була пошвецена и розгварком з домашнїма парохиянами.