НОВИ САД – У орґанизациї Покраїнскей влади, Амбасади Мадярскей у Беоґрадзе и Мадярскей националней тарґовинскей хижи, а под покровительством Скупштини АП Войводини, вчера у Велькей сали Скупштини АПВ отримани Войводянско-мадярски економски форум.
Циль форуму же би ше шицки привредни субєкти на обидвох бокох фокусовали на векше сотруднїцтво и можлївосци хтори постоя, гварел на отвераню Форуму предсидатель Скупштини АП Войводини Иштван Пастор, наглашуюци же политика витворела одлични условия за привредне сотруднїцтво и на привреднїкох же би тоти нагоди вихасновали.
У 2015. року мадярско-сербска тарґовинска черанка була 1,8 милиярди еври, а учасц Войводини у тей черанки коло 40 одсто, гварел на Форуме подпредсидатель Покраїнскей влади и покраїнски секретар за привреду, обезпечованє роботи и ровноправносц полох Мирослав Васин.
Васин визначел же Мадярска барз важни вонкашньо-тарґовински партнер за Покраїну Войводину и на 5. є месце медзи шицкима войводянскима партнерами, после Италиї и Нємецкей. Мадярски компаниї у нашей держави обезпечую роботу за коло 2 500 роботнїкох, а финансийни укладаня до войводянскей привреди виноша коло 200 милиони еври.
Помоцнїца министра за економски одношеня з иножемством Мадярскей Петра Пана визначела же стратеґия мадярскей влади ма 2 цилї – помоц мадярским заєднїцом у сушедних державох, насампредз малим и штреднїм подприємством, и же би тота финансийнапомоц була ефикасна.