РУСКИ КЕРЕСТУР – На вчерайшей заєднїцкей схадзки Одбору за културу Националного совиту (НС) Руснацох и Управного одбору (УО) Заводу за културу войводянских Руснацох (ВР) представени проєкт вибудови Етно-хижи у Бикич Долу, як и обсяжни значни проєкт за очуванє материяного и нєматериялного скарбу Руснацох у Сербиї.
Член Одбору за културу НС Деян Бобаль присутних поинформовал о проєкту вибудови карпатскей Етно-хижи у Бикичу, з крайох у нєшкайшей Словацкей з хторого ше приселєли Руснаци на „долню жем”. У хижи би мала буц и етно-постановка и музей, а за потребни 2 милиони 402 000 динари за вибудов, Бикичанє буду конкуровац на одвитуюци конкурси до Покраїни, за цо маю потримовку Одбору за културу НС и Заводу за културу ВР.
Централни институт за конзервацию (ЦИК) з Беоґраду и Покраїнски завод за защиту памятнїкох Войводини ношителє проєкту „Очуванє материялного и нєматериялного скарбу Руснацох у Сербиї”, хтори тераз у остатнєй фази писаня. Проєкт на схадзки представел член Одбору за културу НС и заняти у ЦИК др Йоаким Стрибер, наглашуюци же би з нїм мали буц документовани нашо памятнїки култури, обичаї, ремесла, алє и рестауровани обєкти значни за историю и културу Руснацох, з цильом и їх будуцого самоотримуюцого розвою.
З тим проєктом, з хторим ше будзе конкуровац до фондох Европскей униї, буду облапени иконостас у керестурскей катедралней церкви, библиотека истей парохиї, млїн и стара руска хижа у Руским Керестуре, потим Руска школа у Дюрдьове и Лєтня владическа резиденция у Шидзе. ЦИК и Покраїнски завод за защиту памятнїкох Войводини остатнї роки уж превжали конкретни крочаї на утвердзованю їх стану, аж и з найусачснейшу ласерску технолоґию, а Як гварел др Стрибер, резултат конкурованя би мал буц познати штредком того рока, а Одбор и Завод вчера и тому проєкту дали началну потримовку.