ГАВАНА (КУБА) – Стретнуце русийского патриярха Кирила и папи Франциска, хторе отримане 12. фебруара, було перше стретнуце поглаварох католїцкей и найвекшей православней церкви од подзелєня християнскей церкви 1054. року. Обидвоме поглаваре церквох наглашели же то братске стретнуце и поволали на обнавянє християнского єдинства, преноша шветово и нашо аґенциї.
У заєднїцкей декларациї папа и патриярх апелую на медзинародну заєднїцу най защици християнох од нападох на Блїзким востоку.
– У велїх державох Блїзкого востоку и Сиверней Африки фамелиї, валали и городи наших братох и шестрох цалком знїщени. Наздаваме ше же нашо стретнуце допринєше же би ше знова запровадзело єдинство яке жада Бог – наведли поглаваре.
После того историйного стретнуца папа Франциско гварел же вон и патриярх Кирил бешедовали щиро и отворено, як браца, прето же маю исту виру и глєдаю исту драгу, а патриярх Кирил поручел же православна и католїцка церква вєдно можу активно робиц на витворйованю заєднїцких цильох.
Вони оценєли же нєобходне обнавянє християнства у Русиї и велїх державох восточней Европи. У заєднїцкей декларациї поволали свойо церкви най нє потримую розвой зраженьох у України, а наздаваю ше же подзелєнє медзи православнима у України будзе превозидзене на основи канонских нормох, як и же „унияценє” нє водзи ґу єдинству церкви.
Папа Франциско и русийски патриярх Кирил з тей нагоди вичерали и дарунки хтори, як оценєте, маю глїбоке символичне значенє. Папа патриярхови подаровал реликвияр у хторим мощи Святого Кирила Александрийского, котри жил у 5. вику, а котрого почитую и католїцка и православна церква. Патриярх поглаварови католїцкей церкви подаровал малу реплику икони Богородици Казанскей, єдну з чудотворних иконох Мацери Божей, хтору ше трима за защитнїцу нє лєм Русиї, алє и чловечества, мира и правди.
Стретнуце отримане на нєутралним терену, на Куби, у просторийох на медзинародним аеродроме у Гавани, дзе були виложени застава Ватикану и ознаки поглавара Русийскей православней церкви.
