БАЧИНЦИ – У Бачинскей парохиї Св. Луки, у присустве красного числа вирних, шветочно преславене швето Воскресения Господнього. Внєдзелю вчас рано служена Воскресна утриня, а потим и Шветочна Служба Божа з пошвецаньом кошаркох з пасхалним єдзеньом.
Вирних на Служби Божей, хтору предводзел парох бачински о. Дарко Рац, у сослуженю з госцом, римоколїцким священїком з Дякова о. Йосипом Вранчичом, було вельо вецей як звичайно. Священїки читали Євангелию на вецей язикох, а по традициї, пречитана Вельконоцна винчованка кир Георгия Джуджара, перше на руским, а потим и на українским язику. По Служби у церковней порти шветочно пошвецени кошарки з пасхалнима єдлами.
Вчера, на Други дзень Велькей ноци на Служби було и мированє, а о. Дарко Рац вчерайшу Службу Божу сослужел з римокатолїцким священїком о. Робертом Фаркашом з Винковцох.
Окреме радує же у Бачинцох знова зажил обичай облїваня, хтори остатнї роки бул занєдзбани. Служба Божа у тей нашей сримскей парохиї будзе и нєшка, на Треци дзень Велькей ноци.
