ДЮРДЬОВ – Вчера дополадня у грекокатолїцкей церкви у Дюрдьове на Служби Божей Першу причасц першираз достали дванацецеро вироученїки другей класи дюрдьовскей основней школи. На служби, хтору служел парох о. Йоаким Холошняй, а знїм причащал ґосподїнски парох о. Михаил Холошняй, першопричашнїком додзелєни и грамоти.
– Перша нєдзеля по Русадльох пошвецена шицким святим, а то тоти котри ше у своїм живоце по остатнєй вири почловечели, покресцели и побожели. Постали людзе, а постац чловек – то найвекша ствар хтора би ше мала случиц каждому чловекови, шицким. Постац чловек значи сполньовац два главни заповиди – любиц Господа Бога, почитовац Исуса Христа и каждого чловека як самого себе. Тото нєшка шицки жадаме вам, першопричашнїком – гварел у казанї дюрдьовски парох о. Йоаким Холошняй.
За тоту нагоду першопричашнїкох пририхтала їх вероучителька Наташа Холошняй, а по Служби, на хторей шпивали члени Церковного хору „Розанов”, родичи и першопричашнїки остали на друженю у парохийним доме.
