НОВИ САД – Компания „Геленик шуґар Сербия”, у чиїм составе робя цукровнї у Червинки и Жаблю, прешлого пиятку у Новим Садзе представела проєкт прейґ хторого продуковательом з фаховима совитами поможе звекшац продукцию цукровей цвикли по гектаре, як и квалитет цвикли.
З проєктом плановане длугорочне сотруднїцтво польопривредних фаховцох и продуковательох цвикли, а облапи 60 парцели поверхносци 620 гектари под цвиклу, сообщене з „Геленик шуґар Сербия”.
На сходзе у Новим Садзе присуствовали вецей як 150 продукователє цукровей цвикли, а компания нєзадовольна з прешлорочну продукцию, хтора була зменшана у одношеню на скорейши роки.
Циль проєкту досцигнуц продукцию од 10 тони цукру по гектаре, гварел директор компаниї Петрос Ґеминцис и наглашел же зоз звекшаньом продукциї цвикли „Геленик шуґар” того року до роботи планує пущиц обидва цукровнї.