НОВИ САД – Перше место по думаню публики на Дванастим Руским фестивалє малих сценских формох „Дюра Папгаргаї” достала монодрама „Срим, наша хижа”, по тексту и у виводзеню Впладимира Балащака, у режиї Драґана Йовичича Йовича. Представа витоворена у продукциї Театру „Ирена Колесар” Дружтва Руснацох у Сримскей Митровици.
Першонагрсдзена представа одбавена вчера, остатнї дзень Фестивалу, як и другонаградзена, тиж монодрама, „Єст ту даяки хлоп?!”, по тексту Свєтлани Рашич, у виводзеню Моники Гарди, а у режиї Аранки Медєши. Представа витворена у продукциї Етно-клубу „Одняте од забуца” з Коцура.
Треце место по гласаню публики достала представа Фадила Хаджича „Пирскаци жирячки малженства”, у режиї Томислава Раца, а у виводзеню Ивани Колбас и Владимир Дудаша з КУД „Яким Гарди” з Петровцох, з Горватскей. Режисер Колбас ше зявює и як ґлумец.
Попри Петровчанох, други дзень Фестивалу, всоботу, 6. децембра, як госц наступел РНТ „Петро Ризнич Дядя” з представу „Пациєнт дохтора Фройда” Миру Ґаврана, у режиї Владимира Надя Ачима. Представа, у хторей ґлумя Александер Мудри, Славко Орос и Ивана Дудаш, першираз одбавена пред новосадску публику, а источашнє то було и перше госцованє нашого националного театру на тим фестивалє.
Вчера на Фестивалє Себастиян Няради Себо з Руского Керестура и Иґор Горняк Пишта з Коцура виведли стенд-ап комедию „Урнебесни колеґове”, по власним тексту и режиї.
Дванасти Руски фестивал малих сценских формох „Дюра Папгаргаї” тирвал од пиятку, 5. децембра по вчера, а у орґанизациї Матки-Дружтво Руснацох Нового Саду-Войводини и Городского одбору Рускей матки Нови Сад. Попри 6 представох, бул представени и новообявени зборнїк драмских текстох з дотерашнїх Фестивалох, з назву ”Масонка”.
Фестивал финансийно потримали Городска управа за културу Нового Саду, Покраїнски секретарият за образованє, управу и национални меншини-заєднїци, Покраїнски секретарият за културу и явне информованє, та спонзоре и донаторе.
