БИКИЧ – Служба Божа на Треци дзень Крачуна, на швето Штефана Первомученїка, у Бикичу була и нагода за виражованє подзекованя дзиячки Любици Роман, котра у церкви у Бикичу дзиячка уж 38 роки.
Службу Божу служели парох у Шидзе и декан сримски о. Михайло Режак и бичиски парох о. Владимир Еделински Миколка, а попри о значносци Первомученїка Штефана за церкву, о. Режак з тей нагоди у казанї подзековал и дзиячки Романовей на єй витирвалосци и пожертвовносци – же скоро штири децениї предводзи церковне шпиванє. Дзиякованє Романова превжала по шмерци єй супруга, дзияка Владу.
И домашнї парох о. Владимир Еделински Миколка подзековал дзиячки Любици Романовей и пожадал єй здравє и шпиванє у церкви ище вельо роки.