НОВИ САД – Войводянски польопривреднїки хтори достали безповратни средства на конкурсу у рамикох суфинансованя набавки опреми за наводньованє и експлоатацию студньох на териториї покраїни, подписали контракти зоз ресорним секретариятом вкупней вредносци коло 40 милиони динари.
У Скупштини АП Войводини хасновательом контракти придал заменїк покраїнского секретара за польопривреду, водопривреду и лєсарство Бранислав Кнежевич.
– З подписованьом нових 65 контрактох покраїнски секретарият обезпечел 40 милиони динари, цо предлуженє инвестициї до польопривреди хторе тирва уж длугши час – гварел Кнежевич. Того року зме до наводньованя инвестовали скоро 220 милиони динари, а у тей хвильки коло 3,5 тисячи гектари под систему за наводньованє – визначел заменїк ресорного секретара з наяву же єст ище средства опредзелєни за тоту намену и же ше у наиходзацим периодзе будзе ознова подписовац контракти.
Тот конкурс бул наменєни физичним и правним особом хтори маю реґистроване польопривредне ґаздовство на териториї АПВ. За реализацию конкурса плановани средства у вкупним виносу од 270 милиони динари. Контракти ше з хаснователями подписує сукцесивно, кед сцигню прияви и кед ше утвердзи же сполнєни шицки условия за набавянє опреми.