Покраїнска влада наполнєла сто днї роботи

автор зам
889 Опатрене

НОВИ САД – Покраїнска влада вчера наполнєла сто днї роботи, так же з тей нагоди  отримана конференция за медиї на хторей предсидатель Покраїнскей влади Иґор Мирович явносц поинформовал о дотераз поробеним, як и о дальших планох Покраїнскей влади.

Мирович як найважнєйшу ствар визначел запровадзованє политичней стабилносци у Войводини, же би ше могло рушиц до проєктох и инвестицийох, як и одличне сотруднїцтво з Владу Сербиї цо, як гварел, скорей нє бул случай.

Як гварел, застановене нєнаменске трошенє пенєжу и же по ребалансу „тераз маме вецей як 1,7 милиярди динари у одношеню на буджет з початку рока”. Винєсол же обезпечени 200 милиони дин. за виплацованє фамелийом котри маю треце дзецко, 150 милиони за анґио-сали у шпитальох у Войводини, 100 милиони за скланянє дзивих депонийох, пенєж за мелиорацию деґрадированих лєсох, та 70 милиони динари за реґресованє трошкох превозу школяром.

Премиєр Войводини визначел же ше з Владу Сербиї будзе робиц на проєктох хтори наволал „проєкти живота и шмерци”, як цо то вибудов Б и Ц оддзелєньох у Клинїчним Центре Войводини, з чим ше достанє коло 30 000 квадратни метери и 400 посцелї за лїченє хорих, ту и вибудов нового будинку Радио-телевизиї Войводини, алє и вибудов Фрушкогорского коридору и Банатскей маґистрали.

На вчерайшей конференциї за медиї Мирович наглашел и роботу на репрограмованю длуства предходней влади, хторе, як гварел, виноши 9,15 милиярди динари, з камату векшу од милиярду динари.

ПОВЯЗАНИ ТЕКСТИ