Порада о злєпшованю стану у обласци рускей култури

автор сен
928 Опатрене

РУСКИ КЕРЕСТУР – Пре чежши стан у обласци култури и пробованє же би ше цо ефикаснєйше ришело проблеми у културно-уметнїцких дружтвох (КУД) и других наших институцийох у култури, вчера у Руским Керестуре отримана заєднїцка схадзка Управного одбору (УО) Заводу за културу войводянских Руснацох (ВР) и Одбору за културу Нациналного совиту (НС) Руснацох.

Схадзку водзел предсидатель НС Славко Рац, з Одбору за културу присуствовали 13 члени, на чолє з предсидательку Одбору Ґабриєлу Саянкович, док з УО Заводу були шесцеро члени, на чолє з предсидательом УО Владимиром Варґом. На схадзки присуствовал и предсидатель Вивершного одбору НС Желько Ковач, секретар Совиту Таня Арва Планчак, як и директор Заводу за културу ВР Серґей Тамаш.

1-NS-UO-02

Институциї, як цо то Дом култури Руски Керестур (ДК), та здруженя – КУД по наших местох, маю проблеми з орґанизованьом, инфраструктуру, а окреме з финансиями, визначене на вчерайшей схадзки. Предсидатель УО Заводу Владимир Варґа гварел же Завод кажди рок видвоює значни пенєж за финансийну потримовку КУД, того року то будзе 500 000 дин., алє треба винайсц стаємне ришенє за їх финансованє. Директор ДК Йоаким Рац винєсол проблем же дотерашнї пенєж хтори ДК доставал з видаваня просторийох пошвидко найвироятнєйше будзе исц до локалней самоуправи, з чим установа останє без дополнююцих приходох з хторих финансує гонорарних сотруднїкох.

Хори „Гармония“ з Нового Саду, „Розанов“ з Дюрдьова и Хор КПД „Карпати“ з Вербасу достаню вєдно 300 000 дин. як финансийну потримовку у тим року од Националного совиту и Заводу за културу ВР, а як гварене, у складзе з можлївосцами, будзе ше помагац и другим хором хтори буду на одвитуюцим уметнїцким уровню. За керестурски Мишани хор предложене же би, як помоц, достал часц зоз средствох хтори Општина Кула того року опредзелї за роботу НС.

Помоц и злєпшанє стану танєчних ансамблом тиж була єдна з темох вчерайшей схадзки, так же за представительох з наших танєчних ансамблох, перше концом априла-початком мая, а потим и на єшень, фаховци з Ужгороду и Пряшова отримаю роботнї, а на основи подписаних спорозуменьох о медзиреґионалним сотруднїцтве АП Войводини зоз Закарпатску обласцу України, односно Пряшовским самоуправним крайом у Словацкей.

На схадзки бешедоване и о медзинародним сотруднїцтве, хторе ше будзе витворйовац прейґ лєтнєй школи, того року вироятно у Словацкей, та черанки наших штредньошколцох и студентох на основи спомнутих спорозуменьох.

ПОВЯЗАНИ ТЕКСТИ