НОВИ САД – На новосадским стадионє „Карадьордє“ штварток, 4. юния отримане Школске першенство у атлетики, манифестация хторей циль насампредз промововац спорт при наймладших Войводянох.
Треце Школске першенство, на хторим ше змагали дзеци од першей по шесту класу ОШ, отворела покраїнска секретарка за спорт и младеж Мариника Тепич, а як промотер школского спорту присуствовал и наш визначни атлетичар Михаил Дудаш.
Тепичова поручела же треба робиц на тим же би дзеци од малючка були активни у рижних спортох, а окремну значносц треба дац праве основним спортом.
Змаганє отримане под покровительством Покраїнского секретарияту за младеж и спорт и Союзу за школски спорт Войводини, хтори през програму „Активни школи“ у наиходзацим периодзе планую дац акцент на школски спорти.