СУБОТИЦА – З нащиву Подручней канцелариї Националного совиту (ПК НС) у Суботици, пондзелок, 29. юния, представителє НС почали обиходзенє шицких подручних канцеларийох и його координацийох, односно КУД по наших местох, у хторих векшином и подручн канцелариї НС.
У Дружтве Руснацох у Суботици з членми Координациї ПК, хторей на чолє Ксения Палатинус, и Управного одбору Дружтва бешедовали предсидатель Вивершного одбору Желько Ковач и секретар НС Руснацох Таня Арва Планчак, котрим домашнї винєсли активносци и проблеми у роботи, як и плани за дальши активносци, насампредз у обласцох за хтори компетентни совити националних меншинох.
Бешедуююци о образованю, учителька у пензиї Наташа Ґрунчич гварела же у сотруднїцтве з Дружтвом за руски язик, литературу и културу порушане же би ше од нового школского року у ОШ „Соня Маринкович” знова отримовало факултативне виучованє руского язика, за цо потребне винайсц одвитуюцу фахову замену. Як гварела, на годзини виучованя руского язика би ше могло назберац достаточне число дзецох.
Тиж так, у Дружтве треба знова порушац активносци и за предшколски дзеци у Суботици, а и за роботу з дзецми у школи и предшколскима потребна и одредзена материялна потримовка, як за порядну роботу, так и за мотивованє дзецох и родичох прейґ рижних наступох, вилєтох, стретнуцох з другима дзецми з наших местох. На розгваркох поведзене же и дзеци зоз Суботици заинтересовани за одход до лєтнєй школи Руснацох у Словацкей.
Попри терашнїх порядних активносцох и манифестациїйох у култури, Дружтво тоту обласц планує прешириц з отримованьом вецей трибинох о култури и мултикултуралносци, пре представянє и другим националим заєднїцом, у чим би, як гварене, мали потримовку и на конкурсох локалней самоуправи. Розпатра ше и можлївосц снованя секциї за ручни роботи женох.
Предсидатель Дружтва Иван Гарди, котри у ПК НС задлужени за информованє, гварел же и у новинох „Руске слово” потребне частейше информовац о роботи Дружтва, а и надалєй Суботичанє найвекши проблем маю з обезпечованьом нових просторийох за роботу.
Локална самоуправа Дружтву понукла 5 нови можлїви просториї, медзитим, анї єдна нє одвитуюца, та ше причека на понуканє вигоднєйшого простору.
На концу нащиви, Желько Ковач домашнїм придал малюнок нашого уметнїка Владу Нярадия з Вербасу, понеже вон каждому КУД подаровал по єдну свою роботу з циклусу „Карпатски мит”.