КОЦУР – У Коцуре пред даскельо днями почала вибудов парохийного дому сербскей православней церкви Успения пресвятей Богородици. Часц средствох за вибудов, 400 000 динари, обезпечени прейґ општинского конкурсу за софинансованє проєктох традицийних церквох и вирских заєднїцох, а 350 000 динари за тоту намену видвоєла Месна заєднїца Коцур.
Попри спомнутих, средства за вибудов парохийного дому подаровали и Желько Рунич и Месарня „3 С”, а православна парохия обчекує же и други єй парохиянє помогню у вибудови дому.
Коцурска православна парохия влонї достала стаємного священїка – о. Здравка Бойовича, котри по вибудов парохийного дому безплатно жиє у обисцу єдного з парохиянох. По одредзованє стаємного пароха, до Коцура приходзел священїк з Вербасу.