СРИМСКА МИТРОВИЦА – Прешлого тижня почали роботи з першей фази реновираня грекокатолїцкей церки Вознесеня Господнього у Сримскей Митровици, на оправяню закрица. Дотераз заменєни стари греди, а тераз тирва виробок статичного елаборату за закрице. Планує ше заменїц шицок череп, за цо треба коло 10 000 фалати.
Завод за защиту памятнїкох култури поробел и фотоґрафиї образох на мурох, же би ше их, у случаю очкодованя, могло цо вирнєйше обновиц.
Закрице на церкви у Митровици часточно обнавяне на два заводи – 1973. и 1999. року, а першираз будзе цалосно.
Средства за першу фазу роботох обезпечени од организациї „Церкви у потреби“ з Нємецкей, а ище вше тирва и акция зберованя добредзечних прилогох од вирних и людзох добрей дзеки. Дотераз прейг 70 фамелиї дало свойо прилоги.
Плановане же за реновиранє нашей церкви у Сримскей Митровици потребни прейґ 20 000 еври, так же шицки котри жадаю помогнуц, най волаю на папрохию до Митровици.