Починаю робиц ресторани и кафичи

автор р. джуджар, фото: pixabay
513 Опатрене
НОВИ САД – Нєшка, 4. мая, отвераю ше погосцительни обєкти, алє ше и роботнїки и госци муша притримовац предписаних  мирох защити oд ковиду-19.

У Здруженю погосцительох Нового Саду потолковане же госци буду мушиц прейсц през дезинфекцийну бариєру котра може буц мокра або суха, а на уходзе до обєкту або до тоалету муши стац дезинфекцийне алкоголне средство.

Предписане же у завартим просторе на єдного госца муши буц 3,5 квадратни метери и єдно место за шедзенє, а на отвореним на єдного госца 2,5 квадратни метери и єдно место за шедзенє.

На месце на котрим госц шедзи муши буц дезинфекцийне алкоголне средство за руки.

Госци нє муша мац рукавици и маски кед єдза и пию.

Кед слово о занятих, обєкти муша мац дезобариєри на персоналним уходу, уходу до продукцийней часци и на виходу до часци дзе госци.

Робу котру прияли, роботнїки муша дезинфиковац и попирскац зоз дезинфекцийним алкоголним средством.

Роботнїки муша мац защитни маски и рукавици, обуй муша дезинфиковац, а униформи муша буц вирайбани на 90 ступнї и випейґлани.

ПОВЯЗАНИ ТЕКСТИ