ШИД/БАЧИНЦИ – У церкви Преображеня Господнього у Шидзе парох о. Михайло Режак вчера, на Богоявлєнє, служел Службу Божу, а у казанї визначел же тото швето єдно з найвекших и у ровнї є з Рождеством Исуса Христа и Христовим воскресеньом.
Тиж наглашел значносц швеценей води у християнским живоце – од кресценя дзецка, през живот чловека, по його шмерц.
По Служби бул обряд пошвецаня води. Парох о. Режак потим з воду пошвецел и вирних, котри швецену воду однєсли дому.
Дзень пред вчерайшим шветом у Бачинцох служена Служба Божа св. Василия Велького з Вечурню, а на Богоявлєнє на Служби окончене и богоявлєнске пошвецанє води.
Вчера пополадню бачински парох о. Дарко Рац з церковнїком пошвецел першу, а на ютре будзе пошвецена и друга половка обисцох. У Бачинцох будзе пошвецене 61-но грекокатолїцке обисце.
Богослуженя з нагоди швета служени и у наших церквох у Беркасове и Бикичу.
