РУСКИ КЕРЕСТУР – На основи предкладаня Комисиї за ускладзованє Статута Месней заєднїци, як и датого предкладаня з Општини Кула, Совит Месней заєднїци (МЗ) Руски Керестур вчера прилапел вименки и дополнєня Статуту МЗ, ускладзени з нову Одлуку о Месних заєднїцох Општини Кула. Вименки прилапени з потребну векшину од цалосного числа членох Совиту – з 8 гласами, кельо члени и присуствовали на вчерайшей схадзки.
У одношеню на предкладанє вименкох достатих од кулскей општини, члени Совиту Статут дополнєли з ище штирома ставками у обласци окончованя роботох МЗ, як и з одреднїцу же би, попри общих условийох предвидзених зоз Законом, секретар МЗ и „активно знал руски язик”, а нє лєм „познал”. Нови Статут МЗ будзе важаци о осем днї од обявйованя на огласней табли МЗ.
Як то за шицки месни заєднїци у кулскей општини, єдна з вименкох у условийох за секретара МЗ же тоту длужносц убудуце годна окончовац особа зоз закончену найменєй штредню школу.
У складзе з новим Статутом вчера ускладзена и ситематизация роботних местох за занятих у МЗ, а понеже терашньому окончовательови длужносци секретара МЗ 6. априла виходзи шейсмешачни мандат, пре почитованє законского термину, принєшена Одлука о розписованю конкурсу за секретара МЗ Руски Керестур.
Конкурс будзе обявени на огласней табли МЗ, а будзе розписани после ступаня на моц нового Статуту МЗ.