РУСКИ КЕРЕСТУР – Управни одбор (УО) Руского народного театру (РНТ) „Петро Ризнич Дядя” на вчерайшей схадзки у Руским Керестуре прилапел звит фаховей комисиї за препатрунок нових драмских текстох хтори сцигли на конкурс цо го РНТ розписал вєдно зоз Заводом за културу войводянских Руснацох и НВУ „Руске слово”.
Звит комисиї обсяжнєйше предочела єй членїца и член УО Ирина Гарди Ковачевич, з констатацию же конкурс бул удатни, понеже сцигли 5 тексти и то цалком нових, младих авторох. Констатоване же потребне обдумац, и у сотруднїцтве з другима нашима институциями, у доглядним чаше витвориц окремну едукативну роботню о писаню драмских текстох, цо указане як важна потреба после того конкурсу. (Резултати конкурсу Рутенпрес обявел ище скорей, по їх обявйованю).
Директорка РНТ Ивана Дудаш УО винєсла прегляд активносцох медзи двома схадзками, дзе було и вецей госцованя з остатнїма двома представами – „Береме ше, так нам и треба” и „Як забиц предсидателя”, а у тей сезони од покраїнских орґанох, як финансиєра, достати средства за єден театрални проєкт. Медзитим, дзекуюци и дополнююцим средством од снователя – Националного совиту Руснацох – РНТ и того року витвори два премиєри.
Перши тогорочни проєкт будзе драма з елементами траґедиї „Вона нє виновата” Йовґена Кочиша, у режиї Михайла Зазуляка, а други комедия „Цо видзела послуга” Джона Ортона, у режиї Владимира Надя Ачима. Пририхтованє обидвох представох почнє тих дньох, поведзене на схадзки УО РНТ.