НОВИ САД – Всоботу, 10. децембра, Покраїнска влада утвердзела Предлог буджету за 2017. рок, хтори виноши 63,6 милиярди динари, цо у одношеню на тогорочни звекшанє за 10 одсто.
О Предлогу покраїнского буджету буду розправяц посланїки Скупштини АПВ на своєй идуцей схадзки, а як гварела покраїнска секретарка за финансиї Смилька Йованович, з додатну 1,1 милиярду динари хтору Покраїна достанє з Републики, покраїнски буджет будзе вецей як седем одсто републичного, цо и предписане з Уставом.
Предсидатель Покраїнскей влади Иґор Мирович гварел же пенєж з буджету будзе унапрямени на ришованє маєтно-правних одношеньох на траси драги Нови Сад-Рума, потим за вибудов Ипсилон краку коло Суботици, вибудов будинку Радио-телевизиї Войводини, а буду звекшани и средства наменєни вибеженцом и розселєним.
Подпредсидатель Покраїнскей влади Дьордє Миличевич оценєл же Предлог буджету оптимални и вибалансовани, а звекшанє од 10 одсто оможлїви вецей средства у шицких секретариятох.