РУСКИ КЕРЕСТУР – У просторийох керестурского Каритасу нєшка будзе отримана друга, духовна часц обуки за волонтерох у Телефонским центре за слуханє „Нїтка”, хтори нєдавно реґистровани на уровню Каритасу Апостолского еґзархату за грекокатолїкох у Сербиї.
На нєшкайшей обуки буду викладац директор Националного Каритасу о. Владислав Варґа и римокатолїцки парох з Бечею о. Ласло Поша.
На обуки участвую коло 20 волонтере з вецей местох, уключени до проєкту Центру „Нїтка”, а пред двома тижнями участвовали и на психолоґийней часци обуки.
Як визначели иницияторе проєкту – вивершни директор Каритасу Еґзархату Янко Катона и координаторка проєкту дипл. психолоґ Соня Виславски, зоз законченьом нєшкайшей обуки шицки волонтере котри на нєй участвовали достаню и одвитуюци сертификат.