ШИД – З нагоди Дня општини и 70-рочнїци ошлєбодзеня Шиду, всоботу, 6. децембра, на Шветочней схадзки Скупштини општини (СО) Шид найвисше општинске припознанє – „Децемберску награду” – достали Никола Васич, предсидатель Општини Шид и Општински одбор Здруженя борцох НОВ (СУБНОР).
Подзекованя достали Бициклистични клуб „Єднота”, поета зоз Шиду Веселин Велько Вучкович, др Бранка Дюрович з Дому здравя Шид, помоцнїк предсидателя Општини Цвєтко Ракич, ОШ „Вук Караджич” з Адашевцох и учителька у пензиї зоз Шиду Драґица Живкович Лела.
Предсидатель СО др Бранислав Маукович и предсидатель Општини Никола Всаич здогадли на збуваня пред 70 роками и поручели же жертви нє буду забути, як и же би мир вично тирвал.
На Шветочней академиї з нагоди 70-рочнїци ошлєбодзеня наступели хор Културно-образовного центру Шид, вокални солиста на ґитари Слободан Тркуля, драмски уметнїк з Беоґраду Лепомир Ивкович, а пригодни слова виповед и професор Душан Лукич зоз Шиду.
Восботу дополадня отримана и Шветочна схадзка ОО СУБНОР, а потим делеґациї локалней самоуправи, борцох и других положели венци на спомин-памятнїк на городским теметове и коло спомин-плочи на будинку Културно-образовного центру. У Народней библиотеки „Симеон Пищевич” отворена и вистава „Наш город – седем децениї у шлєбоди”.