КУЛА – Представа „Велька драма” Синиши Ковачевича, у режиї Деяна Цицмиловича, драмских аматерох КУД „Крущич” з Крущичу преглашена за найлєпшу на тогорочним 57. Републичним фестивалу аматерских театрох у Кули, хтори тирвал од 26. по 27. юний. Треце место и Бронзову плакету освоєла представа Културного центру Кула „Любовен писмо” Кости Трифковича, у режиї Драґана Остоїча
Попри освоєней Златней плакети, режисер „Велькей драми” Крущичанох Деян Цицмилович достал награду за налєпшу режию на Фестивалу, док ґлумци з тей представи – Тамара Плавшич и Никола Булатович преглашени за найлєпших на цалим Фестивалу, а Наташа Минич достала награду за найлєпшу епизодну улогу на Фестивалу.
Представа Кулянцох достала и награду за найлєпшу сценоґрафию, а ґлумци з обидвох представох достали и похвали за свойо виводзеня.
Друге место и Стриберну плакету на Републичним фестивалу достала представа „Тетовирани души” Ґорана Стефановского, у режиї Фауда Тубича, Городского театру зоз Смедеревскей Паланки.
У конкуренциї за награди на найвисшим змаганю драмских аматерох у Сербиї участвовали 8 представи – попри спомнутих и драмских аматерох з Прокупля, Ґорнього Милановцу, Беоґраду, Старей Пазови, та копродукцийна представа аматерох з Боґатичу и Прнявору.